|
|
被視為近年競爭最激烈嘅歐聯4強勁爆開騷！率先登場嘅係意甲4連霸王者祖雲達斯，主場迎戰衞冕嘅皇家馬德里。呢場波被視為「最強防守 VS 最強進攻」，以鋼門保方為首嘅祖記防線，之前4場淘汰賽只係失過1球，只可惜今晚遇着由「帽王」C朗領軍嘅皇馬，「老婦人」想再進一步，似乎有啲難度，阿占認為皇馬可以先拔頭籌，客W有2.4倍，抵博吖！
（有線61、64、201及203、中央5台周三凌晨2:45直播）
祖雲達斯事隔12年後再殺入歐聯4強，靠嘅係一條鐵甲防線，保方、邦路斯、基亞連尼3件意大利國腳，喺近6仗歐聯竟然保住5場不失，如無意外，教練阿里基今晚都會繼續靠穩守食胡，「泊大巴」踢反擊，前線就用倒戈嘅艾華路莫拉達同泰維斯搵食，不過大家要留意一點，就係條防線實在太老，2件射手速度並唔高，根本唔係踢防反戰術嘅好材料，而且莫拉達咩料，皇馬班守將又點會唔知吖，要睇實佢哋怕且唔難。
祖記普巴打柴 派路隨時被榨乾
兩軍以往16次喺歐聯交手，祖記有7勝1和8負，輸少少；淘汰賽6次對決，大家分別有3次晉級，打和！不過阿占講緊嘅係咸豐年代嘅事，正所謂今時唔同往日，祖雲達斯最勁嗰件法國新球王保羅普巴缺陣，冇咗個可以憑一己之力扭轉戰局嘅星級球員，點都差啲啦！另一件中場大腦派路亦年屆35，皇馬3件打仔艾斯高、占士洛迪古斯同卻奧斯出晒名又勤力又好氣，隨時榨乾派路都似！
仲有一點，就係大家咪忘記皇馬主帥安察洛堤同B隊教練施丹，其實都係祖雲達斯傳奇，對舊會非常熟悉。事實上，「肥安」布陣同設計戰術策略係有一手，就睇上Round 8強對住死守嘅馬體會，安帥粒聲唔出將沙治奧拉莫斯推上中場，成功壓制住對手嘅硬朗逼搶，高招！最重要係鋒線靈魂C朗弗到冇朋友，25次帽子戲法冠絕西甲，佢背後又有查維亞靴南迪斯、占士洛迪古斯同加里夫巴利做BackUp，要隊爆祖記防線應該唔難啫！
Data King：「艦隊」半場未試過落後
‧皇馬今屆歐聯半場從未落後，10戰開6次「半贏」4次「半和」。
‧皇馬球星C朗今屆歐聯5次作客披甲4場有士哥。
‧祖雲達斯今季25次主場出戰得1場冇進帳。
頂占筍盤：皇馬（客勝）
盤路解碼：雙方對上8次歐聯對賽單雙單跳，最近1場為入球雙。 |
|
金睛卡
发表于 2015-5-5 13:41
变色卡
显身卡
发表于 2015-5-5 19:16
