拜仁穩守突擊輸唔晒

猪拉多纳

無論足球抑或隊制運動，最難打嘅球隊係本來是熱門，後來因傷停問題、近況不佳等原因，變為被人睇小嘅冷門（Underdog），即係今屆歐聯4強分子拜仁。其實呢支前屆盟主，之前一直係奪標大熱，可惜近期備受傷患困擾，包括兩大主力洛賓同列貝利唔出得，今晚4強首回合作客「地上最強」巴塞，面對無堅不摧嘅美斯、蘇亞雷斯同尼馬「MSN」鋒線，難免變咗Underdog畀人睇低，但係咪一定輸呢？Peter並非包拗頸，不過覺得拜仁唔係冇得打。
高空轟炸恰到巴塞

因為拜仁主帥哥迪奧拿擅於變通，會根據唔同情況作出調整，查實佢試過改踢穩守突擊，今仗亦大可利用拜仁球員嘅身高優勢，採用死球戰術高空轟炸，恰死巴塞一班矮仔。畢竟今仗只係首回合，預計哥帥希望起碼攞個和局及唔失波，絕對唔會同巴塞玩自殺式鬥攻，留待次回合返回安聯球場先爭勝都未遲，拜仁喺8強對波圖作客先輸1比3嘅劣勢下，返主場狂數六個一皮晉級就有辦你睇，所以Peter認為今仗和波同入球細嘅機會較高。
金句：小心由熱門變為Underdog的拜仁