前鋒唔忿氣同三箭鬥攻

猪拉多纳

周中日職開快車，焦點當然係兩大名牌對碰，川崎前鋒主場對廣島三箭。川崎具備爭標級數，但近期突然失準，連續兩場領先下倒輸收場，的確令人意外。不過亦因為咁，相信會更加激起球員爭勝飢渴感，豁出去一拚求反彈。廣島三箭五連勝狀態托弗，細鬼認為雙方會鬥攻，今場選擇入球大。

（有線61及201台周三下午2時直播）
大久保嘉人腳風順

川崎前鋒上仗輸得好唔抵，入波之後卻因為後衞車屋紳太郎被逐，最終寡不敵眾，臨尾連失兩球輸波。細鬼做過球員，知道球員面對呢種打擊之後，更加想贏波，希望重振士氣。川崎人腳唔錯，大久保嘉人、雲拿天奴腳風相當順，踢咗九場聯賽，兩人已合共有十二球進帳。細鬼對川崎入球能力有信心，問題係防線始終較多甩漏，成為一大隱憂。

至於廣島三箭走勢非常好，連贏五場之餘入波亦多，球員每次起腳射門都特別有信心。大家都應該聽過一隊波順起上嚟，往往勒都勒唔住，更何況川崎前鋒近期處於弱勢，相信廣島三箭會更放膽進攻，力爭喺對手身上搶分。兩隊心態上同樣傾向進取，捧大盤啱數。