全北做東食大茶飯

猪拉多纳

出線生死戰唔攻點掂？

全北汽車對山東魯能（足智彩譯FC山東）呢場亞冠盃E組生死戰，除咗1.65倍入球大，實在諗唔到有乜嘢更好嘅推介，事關全北攻擊力唔曳，焗攻嘅山東後防又麻麻，想開細都難。

（now672台周三晚6:30直播）

E組情況基本大定，柏雷素爾11分帶頭，今日响小組謝幕戰作客最弱嘅平陽，打和都可以首名出線，相反第2嘅全北（8分），第3嘅山東（7分），大家都唔輸得，山東仲一定要贏至掂，絕對係一場生死戰。

形勢上對山東非常不利，原因唔單只佢哋非勝不可，最重要係呢班波作客韓國咁耐都未贏過，而且响亞冠先後3次對住全北全部輸清光，今場係百分之百嘅下風波。
山東近8戰入19球

山東啲數據咁「削」，點解唔博全北1.42倍主W呢？首先係賠率太奀，其次係山東鋒線近排有些少起色，單計近8場中超，佢哋就入咗19球，前鋒楊旭有些少拉傷，本來唔係大事，但上場聯賽對重慶都情願唔踢，為嘅就係搏今場。絕境逃生加埋進攻唔弱，保證咗山東有機會入波。

不過，山東條防線實在畀唔到人信心，佢哋近8場波失咗13球，面對住地膽全北好難保證唔失波，更何況全北並冇諗過死守求晉級，教頭崔康熙尋日喺記招講到明要爭首名出線，即係話要啅山東，然後寄望柏雷素爾喺越南輸波，雖然大想頭咗啲，但係就反映出全北唔會咁蠢，主場都求守唔去進攻。大家都敢攻嘅話，冇乜理由開唔到大啫。