紅魔打宮仔誓保前4

猪拉多纳

老細有令 歐聯席位唔失得

曼聯繼宣布用2,500萬鎊簽下荷蘭國腳迪比後，據報今夏仲會再買曉姆斯、根度簡、尼達利基尼，涉及總資金高達1億鎊（約12億港元）。球會願意一早開定水喉，無疑對尹戈爾率領球隊奪得前4位，參加下屆歐聯充滿信心。既然老細肯力撐，尹帥亦係時候交功課，曼聯今晚作客水晶宮，可望喺3連敗後全面反彈，客W1.73倍值博。

（now621周日凌晨零時30分直播）
三連敗後力谷反彈

曼聯連續3場輸波兼捧蛋，被第5位利物浦追至只剩4分差距，但會方似乎對獲得下屆歐聯入場券已胸有成竹，更先使「未來錢」，率先簽下燕豪芬翼鋒迪比。英國傳媒爆料指紅魔會掟１億鎊(約12億港元)擴軍，重量級新兵陸續有來，包括用4,850萬鎊收購多蒙特中堅曉姆斯及中場根度簡，仲會簽埋修咸頓右閘尼達利基尼，令前中後人腳更充裕，應付下季嘅雙線作戰。

曼聯係上市公司，今次肯咁大手筆買人，擺明係計過晒數，認為可以喺歐聯戰場賺番。相信管理層已經落咗「必勝柯打」，要求球隊必須確保前4，餘下3仗一定要搏到盡。事實上，球會提早公布增兵計劃，即可顯示爭霸雄心，振奮士氣，亦係向陣中球員發出警號，如果表現未如理想，隨時冇得留低，各人應會使出渾身解數，爭取表現以保飯碗。
水晶宮洩晒氣等收咧

至於水晶宮同樣連續3場捧蛋，明顯係因為已經攞夠分，唔使再擔憂護級問題，開始放軟手腳等收咧。呢支倫敦細球會之前可以擊敗曼城，一度取得4連勝，全靠一道氣，踢出拚勁，依家呢道氣已經洩咗，恐怕好難再谷得番起，因此雖有主場之利一樣要束手就擒。