史堤芬斯笑看史特加生死戰

猪拉多纳

德甲尾場史特加迎戰緬恩斯，今場係榜尾史特加嘅存亡生死戰，基本上只有贏波至可以保持逃出生天機會，難得終於夫添主場出擊，戰意遠勝踢緊風流波嘅緬恩斯，加上客軍有中場老將艾堅蘇圖重創留下陰影，眾將自然唔敢去得太盡，黑柴推介1.88倍主Ｗ。（有線61及64台周日凌晨零時30分直播）

史特加目前僅得27分包尾，未計今日凌晨漢堡對弗賴堡賽果，都少尾二嘅漢諾威3分，喺得番三輪比賽嘅形勢下，今仗唔贏相信都幾難創造奇迹。不過球隊救火教練，目前德甲年紀最大主帥史堤芬斯賽前表現特別輕鬆，佢認為球員依然應該享受足球帶嚟嘅樂趣，今場當然不能鬆懈，但亦冇必要過分緊張。史堤芬斯話球隊近兩仗對弗賴堡同史浩克都喺領先情況下失分，但佢相信以眾將交出嚟嘅表現，仍然有能力護級成功。

史特加今仗賽前接到利好消息，一對主力中堅魯迪格同尼達美亞雙雙傷愈可以復任正選，近期表現出色嘅防中施利戴爾同箭頭丹尼爾真錫克亦已回歸，今場終於可以夫添出擊。賽前球隊57歲名宿漢斯梅拿因為喺接受奧地利電視台採訪時誤講咗啲有損士氣說話，為保球隊士氣不惜即時辭去董事會職務，足見大家對護級戰幾咁重視。
緬恩斯艾堅蘇圖重創陰影

緬恩斯嚟到季尾已踢緊風流波，上仗主場面對另一護級分子漢堡都全失三分，中場老將艾堅蘇圖仲恐怖受傷膝部重創，有可能收山。今場既然冇搶分壓力，相信一眾戰將喺心有餘悸下唔會去盡，何況今仗仲有主力右閘保辛斯基停賽，中場莊拿斯荷夫曼同尼迪利夫繼續養傷，殘陣作客有六萬球迷力撐主隊護級嘅平治球場，奉上三分可能性甚濃。