細榮阿文再榮休 東方全華班祝賀

猪拉多纳

喺本地波嚟講，南華鬥親東方都係大激鬥！不過今場波就甚有意義，因為係東方兩位球員隊長梁志榮同副隊長姚學文「再榮休」嘅大日子，雖然都唔係第一次退役，但今次應該係最後一次喇，會方為表揚兩位再復出以嚟，對球隊嘅貢獻同埋對足球夢想嘅付出，喺半場嗰陣會舉行「榮休儀式」，等「細榮」同「阿文」可以接受球迷、隊友同行家嘅掌聲同祝福。主帥高尼路亦十分識做，特別喺今場安排一個「全華班」陣容出擊，佢賽前咁講：「好耐都冇見過全華班陣容喇，聽日係『細榮』同『阿文』嘅大日子，我亦曾經喺旺角場舉行退役儀式，場面一定會非常感人，佢兩個一直都幫我很多，兩個都係好專業嘅球員，場內場外好多嘢都值得年輕球員借鏡。」（國際台周六下午2:30直播）

至於今日兩位主角，梁志榮笑笑口話：「又唔係第一次！不過都好開心，又捧過盃，好滿足喇！」今季對和富大埔曾大演帽子戲法嘅姚學文就話：「復出呢兩年，波又入過，盃又捧過，夠晒啦！」兩人透露今次退落嚟之後，會繼續留喺球圈工作，至於係咩角色就要遲啲先知。
米路入場觀戰

南華方面，今場會有「等通知」嘅米路到場觀戰，面對呢位準新帥，相信一班球員陣上都會醒醒定定，特別係因為喺多名主力未傷愈而獲得上陣機會嘅林學曦、羅曉聰同李威廉等等。「呢場波會畀多啲平時較少踢嘅球員上陣，但唔代表我哋會放軟手腳，希望大家珍惜上陣機會。聯賽完啫，但南華嘅球季仲未完，大家亦要繼續努力！」同南華已簽咗下季助教合約嘅列卡度表示。

時間：下午2:30

場地：旺角場

票價：$80、$30（特惠票）