車仔踩紅地氈登場

猪拉多纳

新科冠軍強細搶W

提早封王嘅車路士，今日將喺史丹福橋主場踩住紅地氈接受對手利物浦嘅致敬。呢場波嘅戰果雖然對車仔意義不大，不過相信一班車手點都唔想喺登基後第一戰就喺主場失威，因此車仔部「大巴」應該仲未熄匙。紅軍雖然喺數字上仍有爭前4嘅可能，但實際機會係好渺茫，論人腳紅軍作客想攞3分絕對唔易，加上莫連奴一向係羅渣士剋星，科娜認為好有可能又係1比0收工，主勝同細盤都值捧。

（now 621周日晚11時直播）
頹爆利記列隊迎仇家

車路士上周擊敗水晶宮，鎖定今季英超錦標，今場利物浦就需要喺史丹福橋列隊歡迎佢哋進場。仲記得上季車仔「泊大巴」搞到紅軍冇咗個英超冠軍，如果科娜係利物浦嘅其中一員，今場竟然要列隊歡迎呢隊波，我肯定嬲到震，落場嗰陣一定加多兩錢肉緊，贏波報仇！不過可惜吖，依家嘅紅軍已經冇咗嗰團火，連領隊羅渣士都覺得列隊歡迎呢隊仇人係冇問題！紅軍嘅問題就係成隊波都太後生，羅渣士亦然，而老大哥謝拉特亦死晒火，加上球隊近期個勢好頹，呢場大戰好難踢出紅軍以往嘅激情，更遑論會同車仔踢到飛沙劈石啦！

雖然睇落要搶分爭前4嘅利物浦今場戰意高啲，不過要作客贏車仔始終都係好高難度，事關車仔未必好想贏啫，但主場出擊肯定亦唔想輸，預計車仔今場會歎慢板，穩守為主，以紅軍今季咁弱雞嘅攻力，想入車仔波真係唔容易。
莫帥唔會做順水人情

之前所講紅軍衰在太後生，除咗缺少激情同大戰經驗外，就係太過「天真」，戰術單一，領隊羅渣士唔夠師傅莫連奴咁奸狡，完全中晒「寸王」嘅圈套，上季以為車仔唔會阻住紅軍爭冠？結果造成謝拉特同利迷一生嘅遺憾，所以今場與其幻想車路士會做順水人情，幫紅軍爭前4，不如玩車仔主勝兼投細盤仲實際啦！