三箭在弦衝榜首

猪拉多纳

6連勝撞正軟「腳」蟹

今日日職有場前列大戰，連贏6場嘅「3哥」廣島三箭回師主場迎戰第4位大阪飛腳。三箭近期氣勢如虹，今仗面對剛喺亞冠盃驚險出線、體力未必回復得切嘅飛腳，相信有力再添勝仗，阿謙睇好三箭可以贏波追近甚至超越榜首雙雄，平手盤值捧。

（有線61及201台周日晚6時直播）

三箭上周以1比0擊敗川崎前鋒後，已經錄得6連勝，球隊現時氣勢如虹，前線主力好似戴恩費斯杜格拉斯、佐藤壽人同淺野拓磨近期頻頻有「士哥」，腳風咁順今仗面對飛腳相信都有望取得入球。三箭目前喺積分榜僅以1分落後榜首雙雄浦和紅鑽同FC東京排第3，球隊今仗贏波隨時有機超越前兩者，一眾球員自然會搏盡全力爭勝。
飛腳搏完亞冠未回氣

大阪飛腳則喺上周中嘅亞冠盃分組賽，憑尾段入波主場反勝FC城南2比1，得以躋身16強，但過程相當驚險，班球員亦搏得好盡，今仗未必回得切氣。飛腳由於早前作客輸畀榜首紅鑽，現時已落後榜首4分，爭奪首階段聯賽冠軍嘅計劃受到打擊，士氣亦難免會有所影響，甚至唔排除佢哋會暫時將重心放喺亞冠盃度。

除咗體力輸蝕外，飛腳中後場亦受傷兵問題困擾，後防西野貴治及內田達也今場唔踢得，而中場明神智和、米倉恒貴及後防吳宰碩亦上陣成疑，面對近期着晒火嘅三箭前線相信未必頂得住，平手盤揀係主隊三箭啦！