西維爾追前四客Ｗ心切

猪拉多纳

凡事最好有兩手準備，雖然西維爾剛喺歐霸盃4強首回合主場大勝費倫天拿3比0，一隻腳入咗決賽，贏埋個盃就肯定攞到歐聯席位，不過好多嘢都話唔埋，最好就喺西甲入到前4喇！西維爾依家落後第4位嘅華倫西亞3分，今晚作客切爾達，一於捧客勝！

（now 632及TVB 13周一凌晨3時直播）
切爾達殘陣難抗

西維爾唔單止實力高過切爾達多多聲，連爭勝心都係。西維爾上場對費倫天拿贏得都幾輕鬆，所以今場唔使擔心球員嘅體力問題，排喺第10位嘅切爾達餘下比賽已經係例行公事，都冇嘢好爭嘞，唔係搏命呀？加上切爾達今場有主力射手拉里維、中場卡比爾同後衞曉高馬路坐波監，傷兵又多，中場奧賓拿、守將卡利斯柏拿斯同尼曼查拉度查都缺陣，今場都係無謂阻住西維爾贏波攞3分喇！
馬體會小勝居多

至於排緊第3嘅馬德里體育會亦唔可以掉以輕心，一個唔覺意跌落第4，而西維爾又攞到歐霸盃冠軍，咁馬體會嘅歐聯席位就會拱手讓畀西維爾。馬體會今晚會喺早場作客利雲特，「床單軍團」守強於攻，今場頂多小勝，客勝得1.43倍略嫌太熱，建議改玩細盤。

（now 632及TVB 13周日晚6時直播）