東京獵鹿平手博得過

猪拉多纳

武藤嘉紀好仔又好波

日職首 15:00（日）7 FC東京 Vs 鹿島鹿角

入波獻慈母！武藤嘉紀呢個日職新星果然紅得有理，佢話今日適逢母親節，無論如何都要入波送畀媽咪，有個咁有孝心嘅前鋒，FC東京今日晏晝主場對鹿島鹿角，個2倍平手盤主勝抵博。

單靠武藤嘉紀份孝心就博東京平手勝，當然係攞嚟講，實際原因係足智彩個東京對鹿島嘅賠率，由主勝2.58倍、和3.4倍、客勝2.28倍，調整為主勝2.5倍、和3.4倍、客勝2.33倍，東京主勝輕微升溫，證明咗操盤手唔敢太過睇低佢哋。

事實上由往績去睇，東京的確比較蝕底，佢哋主場17次對鹿島，只得5勝4和8負，勝率只得三成唔夠。但係以近況而論，東京聯賽4連勝，點都比聯賽、亞冠盃2連敗嘅鹿島Sharp醒，而且東京呢兩季防守改善咗，尋常球隊要贏佢哋並唔容易，何況鋒將武藤仲Fit到爆，今季10場日職入咗8球，近兩場波就省咗3粒，中場石川直宏養傷都冇有怕。

講開武藤呢件靚仔，呢排真係做咗日職人氣王，除咗車路士向佢招手，德甲緬恩斯都對佢流晒口水，開價300萬歐元轉會費兼加薪3倍斟介，外流歐洲勢難避免。東京似乎都預咗有呢日，近日簽咗前突尼西亞國腳拉薩特（Lassad），呢件新兵今日仲有機會亮相，拍住武藤攻堅添。
串埋廣島平手

鹿島嗰邊都簽咗件巴西前鋒迪尼爾（Dinei），可惜佢1月起就冇踢過波，今日出場機會好微，頂替唔到剛啱復操嘅達維。繼續地莊人腳出擊嘅鹿島，雖然表現好過季初，都冇條件話贏硬東京，平手盤梗係博主勝。廣島三箭對大阪飛腳同呢場波亦好似，廣島都非常守得，平手盤宜博主勝，用東京、廣島平手主勝玩條平手盤二串一，都係唔錯嘅選擇。

（有線61、201周日晚6:00直播）