阿仙奴開猛火 爆炒天鵝肉

猪拉多纳

連續兩年做「阿四」，今年有機拎亞軍梗係搏啦！阿仙奴今晚喺英超主場對史雲斯，形勢上肯定會去盡，事關兵工廠要爭亞軍，陣中主力又要用表現保住正選位置，而且史雲斯有射手巴菲迪比高美斯傷愈，火力有保證玩1.48倍入球大穩陣。

（now621台周二凌晨3:00直播）

阿仙奴年年都畀球迷笑佢哋目標係保前4，今季有機會自04/05年球季後，再嘗英超亞軍滋味，唔使好似對上兩季咁，連個歐聯席位都爭啲保唔住，仲唔做番齣好戲咩。未計昨晚曼城賽果，現時兵工廠同第2位嘅曼城同分兼打少1場，如果呢場贏到，就可以壓倒對方，你話佢哋點會唔搏？
史雲斯唔怕對攻

雖然阿仙奴有隊長阿迪達同阿歷士張伯倫未好番，但佢兩個嘅傷勢問題已大為好轉，就連養傷半年嘅中場韋舒亞，都能夠喺上星期3:1打沉侯城場波後備上陣，可以預期，嚟緊兵工廠嘅位置競爭會好激烈，唔想被叮走就要醒醒定定。

史雲斯上星期喺主場以2:0砌低史篤城，南韓國腳奇誠庸都有波入，最近走勢唔錯，加埋賽前消息話，射手巴菲迪比高美斯已經傷愈準備好復出，佢喺首循環攻破過兵工廠大門，踢得絕對係好消息，睇怕「天鵝」史雲斯會的起心肝鬥攻，入球大抵玩。