拜仁頹爆翻盤乏術

猪拉多纳

追3球焗攻 啱晒巴塞打反擊

今晚歐聯準決賽次回合，德甲拜仁慕尼黑主場對西甲巴塞隆拿。拜仁首回合作客慘吞3蛋，球隊近期愈踢愈頹，主帥哥迪奧拿已逐漸失去威信，各界紛紛落井下石，加上未能解決嚴重傷兵問題，呢支2013年冠軍返到主場恐怕亦難絕地反擊。拜仁攻守失衡下，遇上當今火力最強嘅巴塞MSN攻擊組合，焗攻隨時死得更快，平手盤再一次推介巴塞隆拿。

（有線61及64台周三凌晨2時45分直播）
哥帥失威信 下台先兆

拜仁兩年前橫掃所有錦標，可惜高層一念之差，引入「西班牙無間道」哥迪奧拿，呢位只係喺巴塞一間球會成功過嘅西班牙人，駕臨慕尼黑後立心將本已登峰造極嘅拜仁大改造，要一班橫掃歐洲嘅頂級球星改變踢法，跟番啱啱輸0比7畀拜仁嘅巴塞嗰套，當時黑柴都話咗死得，結果佢執教至今拜仁愈踢愈沉，除成績外，連昔日霸氣同鋼鐵意志都冇埋。拜仁近期三線作戰連續4場失利，已連續361分鐘冇入過波，上周末聯賽對奧格斯堡，哥帥擺強陣希望大勝為今場造勢，結果10人應戰下輸波而回，攞唔到氣勢仲留唔到力，部署進退失據。

拜仁係世界一流球會，一向對教練耐性有限，哥帥表現愈來愈曳，喺輸畀巴塞同奧格斯堡賽後，佢居然話對球隊表現滿意，強調拜仁贏得聯賽已經係最大成功，更令fans反感，難怪遭各界圍插。名譽會長碧根鮑華批評佢歇冬期放走梳頓沙基利同賀積查治係敗筆，德國盃輸畀多蒙特更不能接受；死敵莫連奴譏諷佢過去成功只係依賴一個美斯；名宿馬圖斯鬧得更勁，認為佢唔應該對一支接近完美嘅球隊作出大改動，話由近日佢同球員嘅矛盾所見，佢已經失去威信，絕對係下台先兆。
MSN為復仇 唔會留手

黑柴係德甲粉絲，對拜仁感情深厚，當然樂意見到拜仁可以大逆轉奇迹出線，但拜仁目前傷兵問題完全冇改善，翻盤嘅可能性微乎其微，為拜仁將來着想，我反而更期待拜仁再輸一仗出局，等高層鐵心解僱哥帥，壯士斷臂先至可以重新開始！

事實上，巴塞近期氣勢如虹，劍指3冠王，今仗夫添作客，加上有兩年前慘敗血仇，就算出線無憂，都會落力踩多拜仁一腳，形勢上拜仁焗住空群出擊，今季已為巴塞轟入紀錄性112球嘅MSN組合必有大把空位打反擊，再炒拜仁絕不意外。