皇馬3箭齊發博大霧 誓斬祖記翻盤

猪拉多纳

歐聯4強次回合，皇家馬德里返回主場大報復，撲擊祖雲達斯！皇馬首回合輸1比2，加上剛於聯賽失分，西甲爭標機會渺茫，為免「三失」，今仗別無選擇，必定傾力搶攻求反勝。不過祖記亦非善男信女，獲「銀河艦隊」垂青嘅保羅普巴復出，要趁機喺皇馬會長皮里茲面前「騷哥利」，證明自己夠班登「艦」，進身頂級巨星行列。一場火併在所難免，首選1.75倍入球大。

(有線61、64、201及203台周四凌晨2時45分直播)

皇馬喺西班牙盃一早出局，上仗聯賽逼和華倫西亞2比2，剩下兩輪比賽，落後榜首巴塞隆拿4分，爭標機會名存實亡，「銀河艦隊」依家惟有孤注一擲，博衞冕歐聯。皇馬雖然首回合輸1比2，但畢竟有作客入球，並非太惡劣。球隊今場最緊要盡快入波，掌握主動權，否則一旦被祖記企穩陣腳，要入波就更加難。
「艦隊」焗攻後防易失

皇馬教練安察洛堤首回合排陣比較保守，僅用C朗同加里夫巴利打雙箭頭，相信今場會擺大個頭，派埋查維亞靴南迪斯擔正，以慣用三叉戟搶攻。「小豌豆」8強次回合為「銀河艦隊」一箭定江山，淘汰馬體會，今場隨時又有佳作，加上C朗、J神等人，位位都射得，入波唔成問題。不過皇馬防守始終麻麻，近3場比賽失咗6球，同埋佢哋之前曾7次歐聯4強首回合輸波，結果全部出局，難免令人擔心前面入埋唔夠後面輸。

祖雲達斯僅領先2比1，並唔可以死守，否則臨尾失守，輸0比1都會出局，所以要爭取入番粒作客入球，先至穩陣。其實祖記今季喺阿里基執教下，踢法進取，首回合更大踢巴塞式「Tiki Taka」同皇馬鬥攻。一對前鋒泰維斯、艾華路莫拉達非常弗，上次如果把握好些少，唔止入兩球。
保羅普巴騷料證身價

祖記今仗仲有一大殺着，就係保羅普巴可披甲，呢位中場全能戰士上仗聯賽復出即入波，以佢嘅射術及突破能力，勢必對皇馬構成不少威脅。「銀河艦隊」一直想將呢位法國國腳收歸旗下，但嫌佢7,000萬鎊身轉會費太貴，保羅普巴正好趁機證明自己物有所值，可同C朗等巨星睇齊。