祖記難頂銀河艦隊搶攻

猪拉多纳

今晚歐聯4強次回合大戰，上屆盟主皇馬返主場再鬥祖雲達斯，雖然「銀河艦隊」落後緊一粒，但由於喺西甲爭標機會極微，必定破釜沉舟力爭衞冕歐聯冠軍，祖記始終技遜一籌，好難頂得住全場，鬼Sir認為皇馬可小勝進身決賽。
皇馬生死關頭逼出鬥心

鬼Sir踢波出身，當然明白球員落場比賽心態，特別係剩番一個爭標機會嗰陣，通常會發揮出無限鬥心，由於皇馬日前遭華倫西亞逼和，爭奪西甲希望愈來愈渺茫，若不計歐超盃同世冠盃呢類非主要錦標，佢哋今季捧盃目標就得番歐聯，可以預期會激起眾將嘅爭勝小宇宙。查實皇馬首回合作客祖記只係輸1比2，仲取得一個作客入球添，今仗只要喺唔失波之下取勝，就算贏1比0都足夠晉級，淨係嗰份「不成功、便成仁」嘅決心都值得捧場。

祖記已於意盃封王及殺入意盃決賽，鬼Sir唔會懷疑佢哋爭歐聯嘅戰意，但與被逼埋牆角嘅皇馬相比始終爭啲，況且以C朗為首嘅「銀河艦隊」全力搶攻，質遜嘅祖記久守好難保不失，鬼Sir覺得皇馬可小勝，連續兩年躋身決賽。