皇馬出齊架生絕地搶W

猪拉多纳

受創C朗惡過豺狼！

受咗傷嘅獅子得人驚，受挫嘅C朗一樣咁恐怖！上星期歐聯4強首回合皇馬作客祖雲達斯落後1:2，今晚返主場非勝不可，以C朗、占士洛迪古斯同巴利為首嘅超重火力靠得住，估計祖記就算擺「鐵桶陣」，都好難守到完場。皇馬1.57倍主勝勁穩陣！

（有線61、64、201及203、中央5台周四凌晨2:45直播）

皇馬力爭第11次歐聯冠軍條路真係有啲崎嶇，8強對住馬德里體育會控制戰局，都係要留到次回合最後兩分鐘，先靠「小豌豆」查維亞靴南迪斯一錘定音。嚟到依家4強大戰，又畀「斑馬」踢傷，首回合落後1:2，好彩嘅係皇馬有1粒作客入球喺手，今鋪回師主場，幾大都擺番大個頭喪攻啦！
首回合怪陣累事 賓施馬有望復出

查實我認為，首回合皇馬輸波唔多唔少係安察洛堤玩嘢累事，平日攻開，突然改踢4-6-0玩穩陣波，班球員咪適應唔到咯！今場要晉級，皇馬梗係踢番最擅長嘅進攻足球，咁樣安排，應該啱晒C朗、巴利等「Goal手」嘅口味啦！

最重要一點，係首回合皇馬雖然排無鋒陣，不過法國前鋒賓施馬今晚有機會復出，而且「小豌豆」上場後備入替，一落到場又生生猛猛，因此今晚無論派邊個上場，皇馬嘅進攻火力都係咁有卡士！尤其C朗自尊心「地上最強」，每次受挫都發晒癲咁反彈，今鋪絕地反擊戰，喺今屆歐聯已經有9個「士哥」嘅佢，係時候爆發小宇宙喇！
祖記作客打折 近4戰僅1勝

今屆歐聯決賽喺德國柏林奧運球場舉行，呢度係祖記兩大主將派路同保方當年替意大利捧走「06世盃」嘅福地，佢兩位就梗係想好夢重溫，可惜「祖記」作客成績認真麻麻，近4場客戰只得1勝1和2負。如果諗住好似8強次回合咁悶和摩納哥0:0出線，真係諗都唔使諗啦！係人都知皇馬鋒力高過摩納哥多多聲，而且左閘艾拉更係皇馬重點攻擊嘅漏洞，所謂久守必失，隨時返魂乏術。
盤路解碼：皇馬近7次主場出擊獲6勝1和，勁入23球。

Data King：祖記征「西」例衰

‧皇馬近7次主場對祖雲達斯獲5勝2負。

‧皇馬過去29次主場對意大利球隊有21勝2和6負。

‧祖雲達斯曾21次作客西班牙，僅得3勝4和14負。
頂占筍盤：皇家馬德里（主勝）