拿玻里殺迪復仇

猪拉多纳

首回合被屈成肚火

歐霸盃4強次回合，意甲拿玻里飛赴烏克蘭，作客鬥迪尼普。拿玻里首回合被逼和1比1，非常唔抵，因為迪尼普扳平嗰球明顯越位。拿玻里含冤待雪，勢必激發球員鬥心，要好好教訓對手。迪尼普今仗移師基輔奧運球場比賽，並非慣用嘅主場，地利優勢受削，寧博拿玻里1.88倍客勝。

（有線62、64、202及203台周五凌晨3時05分直播）

拿玻里首回合全場63%控球率，錄得19次射門，反觀迪尼普只有3次，包括越位入波，反映雙方實力及爭勝決心有好大距離。由於旁證睇漏眼，令拿玻里由贏變和，歐洲主要傳媒亦批評執法水準。拿玻里獲輿論力撐下，有助提升今場贏波信心，作客都唔怕。

由於拿玻里被對手取得作客入球，如果今場打和0比0，都會被淘汰，形勢驅使佢哋要入波求勝。教練賓尼迪斯畢竟係盃賽專家，曾率領華倫西亞、利物浦、車路士奪得歐洲賽錦標，大戰經驗豐富，相信佢已經有計助球隊晉級。
迪尼普移師基輔失地利

迪尼普首次打入歐洲賽4強，已經算超額完成，本身實力亦差拿玻里一截。更不利係今場要移師距離大本營390公里嘅基輔奧運球場比賽，變相失去主場之利，所以唔好以為仲有得受讓咁筍，隨時係糖衣陷阱。