米堡守細波頂賓福特

猪拉多纳

英冠升班附加賽準決賽次回合，米杜士堡主場迎戰賓福特。米杜士堡首回合憑阿武列比達補時階段絕殺對手2比1，今場只要唔輸便可取得決賽入場券。米堡主帥卡蘭卡秉承了車路士領隊莫連奴嘅目標為本風格，以佢哋今季平均一場失唔多過一球嘅表現嚟計，今仗大可睇定嚟食，波童敲入球細。

（TVB 301周六凌晨2時45分直播）
卡蘭卡深得「寸王」真傳

米堡今季喺前皇馬助教卡蘭卡帶領下防守超晒班，唔計上場附加賽，之前46場聯賽只失37球，係唯一一支失球低過40粒嘅英冠球隊，而且佢哋今季喺盃賽對過利物浦、曼城兩支英超球隊都能夠喺法定時間之內保持不敗，便知佢哋有真材實料。

好多球迷都知道卡蘭卡未教米堡前，曾經喺皇馬做過莫連奴副手，故此深得莫帥真傳，依家佢哋有一球優勢，大有本錢踢簡單足球。米堡前線有應屆英冠最佳球員班福特掛帥，反擊力有番咁上下，其他球員只要專心做好防守，對手想攻破佢哋大門唔容易。

賓福特上仗臨尾香，表面上睇好唔抵，不過其實球隊整季演出都唔算穩定，如非打比郡喺煞科日自毀長城，賓福特未必可以殺進前6參加升班附加賽。連同首回合輸1比2，賓福特今季3次鬥米杜士堡全部輸晒，聯賽首循環嚟到河畔球場更加淨吞4蛋，想要收復前失談何容易，預計今場入球數字唔會多，捧細盤啱數。