紅軍--1水到渠成

猪拉多纳

謝拉特晏菲路告別戰

「當我死咗，唔好送我去醫院，直接將我送去晏菲路。」呢句係網上流傳嘅謝拉特名言，謝拉特對利物浦嘅忠心毋庸置疑，可惜佢最終都未能夠成為紅軍一生一球會嘅代表人物，今場英超主場對水晶宮將係呢位「神奇隊長」喺晏菲路嘅告別戰，現場4萬幾名球迷將搖旗吶喊，歡送佢哋最尊敬嘅隊長，喺呢個咁感人嘅一刻，無心戀戰嘅水晶宮無謂阻住晒，一於撐紅軍用勝利同「謝四」Say Goodbye，捧讓球主勝！

(now 621周日凌晨零時30分直播)

謝拉特嘅紅軍生涯充滿傳奇同戲劇性，未開始就差啲要終結，細細個喺街場踢波嗰陣畀一個生晒銹嘅大叉插傷腳趾公，醫生曾建議要切除佢嘅右腳腳趾公，好彩佢父親堅持唔切得，亦全靠醫生嘅技術，呢個球壇先至出現謝拉特呢位傳奇人物。喺利物浦市土生土長嘅謝拉特最終夢想成真，効力佢最愛嘅紅軍，擸咗多個冠軍，但正如佢日前喺告別記招所講，贏唔到英超係一生最大嘅遺憾，上季「世紀一跣」就跌咗個冠軍，不過根據科娜嘅觀察，大部分利迷都冇怪責過「謝四」，佢為紅軍付出咗太多，又點會鬧得落呢？
水晶宮難搞寸Party

雖然好唔捨得謝拉特離開，不過佢今季勁跌Watt係不爭嘅事實，離開無論對佢定對利物浦都有好處。下季冇咗「謝四」，紅軍將踏入一個全新時代，換上新波衫贊助商嘅紅軍今晚或會着上新衫同水晶宮鍊過，而「謝四」更會係最後一次着上紅色波衫上陣（下場作客史篤城極有可能着作客波衫）。喺一場咁有意義同紀念價值嘅比賽，無論係謝拉特定其他紅軍球員，都會拚盡全力，用勝利為呢個「謝拉特大時代」畫上一個完美嘅句號。上晒岸嘅水晶宮一早等緊放暑假，近4場全敗，今場咪搞寸「謝四」嘅告別Party喇！
蠟像騎呢 散水餅有心思

謝拉特離英在即，杜莎夫人蠟像館就拎咗「謝四」嘅蠟像喺利物浦市巡遊。不過，紅衫、紅褲加對離奇白襪，真係唔知佢想點，而蠟像仲帶埋件「謝四」即將加盟嘅銀河波衫，但就仲係上季個款，認真奇怪！相比起杜莎夫人蠟像館，紅軍就有心得多，喺謝拉特告別晏菲路記招，送出一個8號波衫蛋糕做「散水餅」，而且仲有Cup Cakes畀記者食，Cup Cake上面塊糖膠仲印咗「謝四」喺紅軍生涯嘅重要時刻，搞到大家都唔忍心食落肚！
臨別贈言：搵個好前鋒

「謝四」臨走前不忘向紅軍老闆提出忠告，就係如果想重返頂峰，就買個頂級射手返嚟：「想入到前四，就需要簽一個可以每季入25至30球嘅前鋒。當我哋季初失去蘇亞雷斯時，我覺得只要史杜列治保持狀態，我哋係可以企穩前四，因為佢擁有蘇亞雷斯嘅能力，可惜佢長期受傷。」謝拉特同時勸告仍未續約嘅史達寧繼續留隊，唔好走人。
告別戰靴玩埋YNWA

波鞋贊助商adidas喺謝拉特晏菲路告別戰，準備咗一對特別波砵向偉大嘅隊長致敬。「謝四」尋日練波率先着上呢對以紅白為主色嘅波砵，鞋頭採用紅白寓意「謝四」將由紅色嘅利物浦轉到白色為主色嘅銀河。謝拉特名字縮寫「ＳＧ」就印喺鞋尾，佢嘅小朋友名就印喺入面，而喺adidas傳統黑色三間旁邊，就印有紅軍會歌「You'll Never Walk Alone」嘅簡寫「YNWA」，果然係誠意之作。
17年如一 髮型都專一

謝特拉最黃金嘅時間都喺利物浦度過，英媒《ＢＢＣ》近日就喺英超球員集圖冊入面，搵番謝拉特呢17年嚟個Look有咩轉變。睇番集圖冊嘅貼紙，「謝四」除咗個樣愈來愈成熟外，估唔到髮型竟完全冇變到，1998年時嘅頭髮造型，去到2015年都係一模一樣，果然夠晒「專一」。