李城鬥心爆棚逃出新天

猪拉多纳

護級「5苦」 最後2輪定生死！

英超冠軍雖然塵埃落定，不過唔代表呢個歐洲頂級聯賽冇嘢睇喎，事關護級形勢一樣咁刺激！家陣英超剩低2輪，除咗QPR同般尼篤定降班，其餘嘅侯城、新特蘭、紐卡素、阿士東維拉同李斯特城當中有一隊要「陪葬」，當然要搏埋條老命逃出生天啦！季尾谷底反彈嘅李斯特城今晚造訪新特蘭，戰意大家一樣咁堅，但講到狀態，就梗係近7戰6勝嘅李城弗好多啦，讓球盤開平手盤，撐1.89倍嘅李斯特城！

般尼同昆士柏流浪來季已肯定要降落英冠作賽，依家尾3嘅侯城到第14位嘅維拉只係相差4分，「護級5苦」當中有一隊要落埋去「地獄」陪QPR同般尼。

論氣勢，李斯特城嚟到季尾，竟然搖身一變成為歐洲數一數二嘅弗爆球隊，近7場聯賽贏咗6場，豪搶18分，只係對榜首車路士先至輸波，真係唔到你唔服！「狐狸」由長期包艇到最近取得連場勝仗，領隊皮雅臣絕對功不可沒，早前佢亦大熱當選英超4月份最佳領隊，認真威水！
烏路亞喪入波 李城近7戰6勝

李城依家有37分排第15位，護級形勢算係唔錯，再加埋佢哋啲傷兵已經陸續歸隊，實力可以話有增無減。主力射手荷西烏路亞狀態弗到漏，喺對紐卡素一仗當中更梅開二度，聯賽士哥已累積到10球，今晚烏路亞繼續孭起條鋒線，火力相當靠得住。
尾2輪連鬥兵車 新特蘭今鋪焗攻

另邊廂，「黑貓」新特蘭為咗護級，成班球員最近大踢爭氣波，近2場比賽分別擊敗名次較高嘅愛華頓同修咸頓，呢輪亦係佢哋今季第一次拎到2連勝，只可惜幾弗都好，講到近排嘅表現同成績，始終唔及李斯特城，最大鑊係佢哋黎緊要分別硬撼阿仙奴同車路士，分分鐘佢哋都已經打定輸數，今鋪肯定要焗攻，防線隨時被烏路亞射爆，讓球盤開平手盤，梗係撐李斯特城啦！
新特蘭 Vs 李斯特城

now621台周六晚10:00直播
兩軍近5次聯賽碰頭全開「半場和」。