勝利悉尼對攻爭霸

猪拉多纳

2.5億球迷大飽眼福

澳職王者今日誕生！澳職總決賽會由「常規賽一哥」墨爾本勝利主場硬撼ＦＣ悉尼，呢兩支喺常規賽入波最多嘅球隊，近期同樣火力全開，近兩場各轟入6球，嚟到決賽梗係唔好畀佢停，球迷今場有望大飽眼福，欣賞一場精彩入球騷，一於撐1.7倍嘅入球大！

（有線64及203台周日下午2時直播）

澳職近年愈嚟愈受歡迎，今場總決賽預計會成為澳職史上最多人睇嘅比賽，單單喺澳洲就可能會有65萬名球迷欣賞呢場王者之戰，而全球觀眾更有望高達2.5億人，歐洲、北美洲同亞洲都有轉播。有咁多球迷睇，墨爾本勝利同ＦＣ悉尼今場更要踢場好波送畀大家！
勝利誓報連霸斷纜之仇

勝利同悉尼都分別攞過兩屆澳職總冠軍，而09年盟主嘅勝利未能喺10年達成兩連霸，正正就係喺總決賽互射12碼飲恨悉尼腳下。今次再遇，勝利戰意毋庸置疑，肯定想報番一箭之仇。墨爾本勝利可以話係擁有全聯盟最強攻擊線，阿爾巴尼亞籍前鋒貝利沙、本土老將艾奇湯臣，仲有巴西進攻中場古希美，個個都入得又傳得，上輪4強戰已經炒墨爾本城3蛋，今場更有主場球迷嘅吶喊打氣，完全唔使擔心勝利入唔到波！
近兩次對賽全開3:3

作客嘅ＦＣ悉尼攻力唔會比對手差，喺常規賽得球都只係少勝利4球，佢哋嘅奧地利「長人」真高雖然已經31歲，但照樣喺常規賽入咗16球，效率好高。ＦＣ悉尼對上兩次面對墨爾本勝利都打和3比3，可見兩隊實力不相伯仲，又鍾意對攻，大盤有1.7倍千祈咪走雞！