賓菲加入球騷賀提早登基

猪拉多纳

除咗西甲，葡超領頭羊賓菲加今輪贏波亦可提早封王，佢哋作客甘馬雷斯鬥心唔使懷疑，不過有一點要留意，賓菲加目標係攞三分，唔一定要大炒，讓球主客和作客讓一球唔抵玩，甘馬雷斯近期場場有波入，而且主場發揮唔錯，從菠菜角度睇，今場玩大盤更划算。

（有線155台周一凌晨1時直播）

葡超仲有最後兩輪，現時賓菲加領先次席嘅波圖3分，由於葡超唔係計得失球，而係計對賽成績，「里斯本雄鷹」今季對波圖一勝一和，即是話佢哋今仗只要全取3分，波圖剩番兩仗贏晒追到同分都冇用，賓菲加可以提早一輪封王。
甘馬雷斯態勇唔會捱打

基於咁嘅形勢下賓菲加鬥志肯定高，問題係今仗對手甘馬雷斯近況亦唔錯，最近7場聯賽場場有波入，今場唔一定捱打，佢哋已經穩奪下季歐霸盃入場券，主場唔怕同鬥攻，玩番大盤穩陣啲。

至於次席嘅波圖作客比蘭倫斯都係冇得諗咁多，先做好自己本分，再望奇迹發生。比蘭倫斯最近2場主場全敗，而且都輸畀對手一球以上，擺明季尾放軟晒手腳，波圖發力應可數多幾粒，揀讓球客勝。

（周一凌晨1時開賽）