阿古路着火曼城歎燒鵝

猪拉多纳

雖然四大皆空，但曼城季尾全力衝擊亞軍，並希望力壓死敵曼聯過終點，今晚英超早場就作客對有恩佢哋嘅「天鵝」史雲斯，勢必恩將仇報，加上王牌射手阿古路着晒火，呢隻「天鵝」隨時變「燒鵝」，客勝不容錯過。

（now 621周日晚8時30分直播）
史雲斯傷兵多

史雲斯上輪擊敗第3嘅阿仙奴，直接幫咗曼城穩站「二哥」位置，估唔到一周後「藍月亮」就要造訪「恩人」。不過球場無父子，上季後上奪冠嘅曼城，今季卻冇盃落袋，眾將除咗想做「阿二」攞番個尾彩，亦起碼壓住同市死敵曼聯，依家佢哋領先紅魔5分，只要今仗贏波便可達標。

曼城領隊比歷連尼賽前講明王牌阿古路係非賣品，大讚呢位阿根廷國腳進步神速之餘，不忘鞭策多句話佢仲可以變得更出色，查實阿古路今季聯賽已轟入25粒排射手榜榜首，包括上仗對昆士柏流浪大演帽子戲法，遙遙領先次席嘅熱刺超新星哈利卡尼5球，可謂金靴在望，既然比帥有說話畀佢聽，「阿古獸」定必加多兩錢肉緊博士哥。況且「藍月亮」剛收到喜訊，獲確定成為下屆歐聯分組賽第二檔次球隊，或可避免再被抽入死亡之組，令士氣大振，面對有基爾洛頓、佐迪阿密特、魯迪治、湯卡路爾及尼爾遜米基爾缺陣嘅史雲斯，真係不勝無歸，客W有1.53倍咪嫌少。