主人變陪客 烏法成全辛尼特

猪拉多纳

俄超盟主勢於今晚誕生！俄超踢到倒數第三輪，班霸辛尼特已經領先次席嘅卡斯洛達八分，今晚作客下游球隊烏法，只要贏波即可提早封王，基於烏法主場容量太細，俄羅斯足總同辛尼特齊向烏法建議，將今場比賽移師辛尼特主場踢，烏法左計右計今場都係唔夠辛尼特踢，為得到較多門票收入決定同意，原本嘅主人家甘願作客做陪客，甚至會保留實力等下一場至搏，唔阻辛尼特開Party，一於熱捧讓球客勝。

（now 670周日晚9時直播）

烏法係俄羅斯足球幼兒班，球會喺2010年至成立，今季首次參戰俄超，目前排到第12名算好本事，雖然佢哋仍然需要搶分，但自量無論點都唔夠辛尼特踢，烏法嘅戴拿模主場只可以容納四千五百球迷，最終決定接納足總同辛尼特建議，將比賽移師可容逾二萬觀眾嘅辛尼特主場：聖彼得堡柏度夫斯基球場舉行，即係主場變作客，唔阻人發達之餘亦可以有多啲門票收入，球隊預期唔會積極抵抗，隨時收起主力慳番啖氣留番下場至搏殺。
保亞斯捧盃賀幼子出世

辛尼特冠軍在望，今晚作客變主場，球迷掀起撲飛潮，主場將會畀藍白旗海吞噬。首季執教球隊嘅葡萄牙教練保亞斯近期事事稱心，佢嘅幼子啱啱喺星期日健康出世，今晚當然想喜上加喜，雖然前鋒荷西朗頓停賽，中場法素林亦缺陣，但球隊兵力仍然遠勝烏法，何況近四仗入咗三球嘅巴西箭頭侯克目前以14球喺射手榜帶頭，領先次席中央陸軍嘅尼曹兩球，今晚就算領先咗都會去盡數胡，唔會放過攞埋神射手榮譽。