博車仔客W有回布

猪拉多纳

迪哥復出增添獸性

今晚英超上演獨腳戲，西布朗喺主場恭候今季盟主車路士。咪睇「藍戰士」提前封王，就以為佢哋會揸流攤，領隊莫連奴賽前講到明以贏波為目標外，仲揚言「野獸」迪亞高哥斯達今仗有望復出披甲，對住鋒線啞火嘅西布朗，相信可以睇定嚟食，博1.78倍客勝乃不二之選。

（now621台周二凌晨3:00直播）

莫連奴賽前向西布朗主帥佩尼斯大笠高帽，話如果自己係英格蘭球會班主嘅話，實搵佩尼斯擔任教頭，讚到對方天上有地下無。之不過讚還讚，「寸王」講到明會尊重今場「例行公事」，誓要全力爭勝咁話。老實講，車仔上輪鬥利物浦都冇Hea踢，只係派遣約翰米基爾、羅夫度斯卓克兩件副選，夏薩特、法比加斯等主將悉數上陣，戰鬥力唔講得笑。
「寸王」保證唔hea踢

除咗贏波決心夠同陣容有保證，車仔仲有靚績支持，佢哋今年初英超不敵熱刺後，近16場聯賽拎到11勝5和，其中7場作客賽事，撇除因為爭標形勢一心守和阿仙奴，其餘6場全部贏晒。最重要係自4月初受傷後一直倦勤嘅迪亞高哥斯達，「寸王」透露佢今場復出搏殺機會唔細，「藍戰士」有埋呢位球隊首席射手喺前線擔大旗，要開客W話咁易啦！
西布朗鐵三角啞火

早前經歷3連敗嘅西布朗，近期表現逐步回穩，近4場英超2勝2和未輸過，弊在佢哋今季對住三甲球隊例衰，無論主客場出戰都逃唔過輸波厄運。再講，西布朗首席射手比拉希奴近況曳到爆，連續9場冇斬獲之餘，尼日利亞孖寶安尼捷比、伊迪耶又幫唔到咩手，要撕破防守最強嘅車路士防線都幾難，就算今場係佢哋嘅主場謝幕戰，睇怕難逃一敗。
Data King：車仔近16戰聯賽贏11場

‧西布朗近10次鬥車路士只得1場保持清白身。

‧車路士今季英超6次讓半一賽事有4次贏盤。

‧車路士近16場英超取得11勝5和不敗佳績。
乜都玩錦囊：車仔超班博埋「半客」

西布朗近10次鬥車路士只得1場冇失波，其中7場更係開出「半輸」。既然車仔教頭莫連奴講明今場盡砌，睇怕西布朗連半場都未必頂得住，不妨揀埋2.35倍「半客」。