美斯搶金靴 巴塞炸拉科

猪拉多纳

煞科日仲有嘢爭

西甲終於嚟到最後衝線，雖然巴塞上輪已提前封王，但唔代表今晚煞科日冇睇頭，淨係睇兩大球王美斯同C朗為爭金靴鬥入波，已經夠晒過癮喇，仲有馬體會、華倫西亞同西維爾為來屆歐聯入場券爭崩頭，而且佢哋嘅勝負，甚至牽連到幾支護級球隊能否逃出生天，所以識睇一定睇西甲煞科戰！

上輪巴塞隆拿作客擊敗馬體會，提早奪得聯賽冠軍，今晚佢哋返主場出戰仍有降班危機嘅尾四拉科魯尼亞，會否令佢哋戰意鬆懈呢？斯維認為唔會，捧讓球主勝冇甩拖。

（now 632周日凌晨零時30分直播)

正所謂得一想二，儘管聯賽錦標已袋袋平安，但巴塞球王美斯亦想搶埋神射手，依家佢累積41粒，落後皇馬死敵C朗4球，由於皇馬對基達菲要晏少少先開波，美斯想過C朗頭的話，真係要瘋狂數胡入多幾粒，將壓力卸畀C朗，而且今仗只係對尾四嘅拉科，以美斯嘅級數冇話冇可能，肯定數得就數。
力爭大炒歡送沙維

同時，巴塞隊長沙維剛宣布下季轉投卡塔爾球隊艾薩德，今戰會係佢離隊前嘅西甲謝幕戰，呢位喺巴塞度過咗17個寒暑嘅老將，乃「地上最強」中興嘅功臣，故對拉科時眾將會着住印有「感謝沙維」嘅特別版波衫，相信會激起佢哋嘅鬥心，用一場漂亮勝仗送別沙維。

拉科家陣喺降班邊緣，依家只係多尾三嘅伊巴同尾二嘅艾美利亞2分，而且對賽成績又唔及艾美利亞，今場就算和波都唔係一定安全。不過以佢哋咁曳嘅防守，作客魯營搶攻猶如送死。況且今仗賽後會進行捧盃儀式咁happy，巴塞又點會失分咁掃興呀，讓球主勝咪錯過。
C朗好勝數爆基達菲

至於皇馬主場對基達菲，唯一睇頭係依家入咗45球嘅C朗能否登上神射手寶座，呢位葡萄牙萬人迷一向好勝，可以睇定死敵美斯對拉科入幾多粒，先至決定數幾多球都未遲。不過「銀河艦隊」近4次喺巴拿貝球場對基達菲，有3次炒對手3球或以上，就算讓兩球照捧讓球主勝。

(now 633周日凌晨2時30分直播)