紅軍意興闌珊撐對家

猪拉多纳

利物浦喺今晚英超煞科戰會作客史篤城，但一班球星似乎唔係太緊張，早前仲一齊開派對。不過謝拉特、巴洛迪利同史達寧都冇到場，有傳史達寧已私下承認將加盟曼城，球隊軍心不穩難贏主場甚具惡氣嘅史篤城，捧讓球主勝。

（now 625周日晚10時直播）

利物浦後衞荷西安歷基早前上載一眾紅軍球星開派對影片，差不多所有球員都有出席場面熱鬧。菲臘比古天奴更表演精彩嘅森巴舞，不過3名紅軍重要人物缺席，包括隊長謝拉特、前鋒巴洛迪利同史達寧。巴洛迪利今夏似乎肯定離隊，而「謝四」似乎亦唔想搶隊友風頭，兩人唔出席亦唔出奇。
史達寧私下承認去曼城

至於史達寧冇出席，難免惹來揣測指其去意已決。據英媒《每日郵報》報道，史達寧已私下承認將加盟曼城，會獲得一份5年12萬英鎊周薪嘅合約，轉會費為4,500萬英鎊（約5.4億港元）。紅軍今仗仲有法拿根及史杜列治因傷缺陣，陣容不整，面對主場表現唔錯嘅史篤城，近4仗作客未贏過嘅紅軍難望全取3分，阿謙捧史篤城讓球主勝。