凱沙羅頓爭升班決心大

猪拉多纳

入集訓營谷狀態

尋晚睇完德甲煞科，今晚就輪到德乙上演大結局，除咗「一哥」恩高斯達特確定升班外，另一個直接升班席位同附加賽資格仲要爭崩頭！當中排第4位嘅凱沙羅頓今晚主場迎戰恩高斯達特，要殺入前3名更係不容有失，肯定會借主場之利搶攻，不過恩高斯達特做得冠軍都唔係弱者，今場放開包袱同凱沙羅頓死過，1.72倍入球大無走雞！

（有線64及203周日晚9:30直播）
恩高斯達特講明鬥攻

凱沙羅頓目前同卡爾斯魯厄同得55分，只因得失球唔及對手排第4位，但就同第2位嘅達斯泰特得1分距離，只要前面兩隊稍有差池都有機會後來居上。唔講唔知原來佢哋係今季德乙主場王，16次聯賽主場出擊贏咗11場咁多，今場肯定會先做好本分，大踢進攻足球全取3分，尤其係班波日前就搞咗個集訓營備戰今場波，重點係操起菲臘賀夫曼同西蒙祖拿兩件箭頭嘅狀態，可見佢哋爭勝決心有幾大！

恩高斯達特攞到德乙冠軍後，已經安排嚟緊星期一搞個6小時嘅勝利巡遊，相信班球員都唔會想輸波先開P啩？尤其係以呢班德乙冠軍嘅球員質素，喺無壓力情況下，為咗答謝球迷支持，可能會更加放膽做場大騷，當中今季入咗9球嘅史提芬歷斯同軒達施亞都話想以「雙位數」入球完成球季，等如話你聽今場要開大囉！
頂占筍盤：凱沙羅頓 （入球大）