沙維爆喊告別魯營

猪拉多纳

西德煞科戰變催淚夜

告別我的球壇英雄！今個球季嘅煞科戰充滿離愁別緒，繼「神奇隊長」謝拉特喺晏菲路向利迷作出告別後，巴塞忠臣沙維尋日凌晨亦喺魯營踢畢最後一戰，呢位殿堂級中場更兩度灑淚向粉絲道別，真係連非巴塞迷都深受感動呀！德甲嗰邊亦有多蒙特Icon高普最後一次喺主場領軍出戰，「多粉」拉晒巨型橫額多謝呢位英雄，同高普講聲You'll Never Walk Alone（你永遠不會獨行）！

天下無不散之筵席，講就容易，好似沙維呢啲見慣大場面嘅頂級球星，最後一次喺西甲亮相一樣忍唔住流下男兒淚！昨晨巴塞隆拿喺煞科戰主場以2比2賽和拉科魯尼亞，球會同球迷出動巨型海報同感人片段兩枚「催淚彈」歡送，難怪沙維兩度爆喊啦！
巨型海報感人片段送別

呢場波巴塞有美斯梅開二度，不過沙維先至係主角。効力咗「地上最強」17個球季嘅沙維昨仗帶起隊長臂章正選落場，領隊安歷基喺完場前4分鐘將呢位來季轉戰卡塔爾嘅老將換走，近10萬名球迷即刻起立致敬，當時沙維已經眼濕濕咁向全場拍掌回應，返到去後備席就即刻忍唔住掩面爆喊。

贊助商adidas今場特別為沙維炮製咗全球限量17對嘅告別版波砵，巴塞球迷更舉起寫上「多謝沙維」嘅巨型海報，加埋會方喺奪冠儀式時播出嘅感人致敬片段，主角沙維致辭嗰陣又喊多鋪，佢話：「真心感激一切，今日我係全世界最快樂嘅人。但正如教練安歷基所講，巴塞今季仲未完結，我哋希望有多兩個獎盃（西班牙盃同歐聯）同大家慶祝多次！」賽後一眾隊友包括美斯在內都喺網上「鋪」相，再一次向呢位巴塞傳奇致敬。
2:2放生拉科 累伊巴降班

不過巴塞今場放生拉科未能贏波，就累咗伊巴降班，伊巴雖然喺煞科戰大破科爾多瓦3比0，追到同拉科及CF格蘭納達同分，但因對賽成績較差，最終飲恨降班。
西甲頒獎台

冠軍：巴塞隆拿

歐聯分組賽：巴塞隆拿、皇家馬德里、馬德里體育會

歐聯外圍賽：華倫西亞

歐霸盃：西維爾、維拉利爾、畢爾包

降班：科爾多瓦、艾美利亞、伊巴

神射手：基斯坦奴朗拿度（皇馬、48球）