三箭日聯盃例Hea踢 撐東京好過

猪拉多纳

日聯盃分組賽今晚有直播睇，廣島三箭喺A組主場對FC東京，讓平半要唔過。現時廣島喺日職仲有機會爭標，既然佢哋喺日聯盃慣性Hea踢，射手佐藤壽人又多數休息，不如博東京開下盤好過啦！

（有線61及201台周三晚6:00直播）

廣島日前喺主場以4:2砌低新潟天鵝，繼續喺聯賽落後榜首嘅浦和紅鑽4分，就算佢哋打多1場，計落都仲有機會爭奪首階段聯賽錦標，加上佢哋喺分組賽得1勝2和1負，只係贏過升班球隊松本山雅，而且慣性收起主力，呢場又點似會搏命呀？
佐藤壽人未好番

事實上，廣島射手佐藤壽人已經連續3場日聯盃休息，證明高層重視聯賽多啲，而且最近佢受到傷患困擾，今場更加唔似會冒險落場，如果唔係，佐藤壽人受傷就真係要喺聯賽扯白旗投降，就算主場出戰都信唔過。

另一方面，FC東京日前喺主場以0:1不敵名古屋鯨魚，近排走勢好差。不過咁，雖然東京都未必出強陣，但最低限度，中場東慶悟同後衞簡連尼坐完波監可以候命，王牌武藤嘉紀又踢過兩場分組賽，就算留力牌面都好過廣島嘅。