烏克蘭留前鬥後 新西蘭半和咪走寶

猪拉多纳

世青盃開波喇！

世青盃聽朝正式開打！今屆揭幕戰由東道主新西蘭U20喺North Harbour Stadium，迎戰第3次殺入世青盃分組賽嘅烏克蘭U20。雖然新西蘭喺世青盃戰績向來麻麻，不過話晒今仗都喺鄉親父老面前表演，半場起碼可以唔輸先，況且烏克蘭踢開穩陣波，2.25倍半場和值博。

（開賽時間：周六早上9:00）

今次係第20屆世青盃賽事，同時亦首次喺新西蘭舉行，呢支東道主未敢怠慢，一共揀咗7個主辦城市幫手舉辦賽事。聽日場揭幕戰將會喺奧克蘭舉行，預料到時唔少國民都會聚集喺呢個新西蘭最大城市，入場為呢班波打氣，對振奮新西蘭士氣肯定有幫助。
新西蘭召多件外流兵

新西蘭雖佔有地利，不過想輕鬆贏波睇怕唔係咁易。事關佢哋喺對上4屆比賽3次殺入分組賽，錄得2和7負不勝嘅羞家成績之餘，防守亦完全唔掂，無論喺嗰9場世青盃分組賽，定係賽前搵嚟包括巴拿馬U20等4支球隊拍跳，呢班波始終解決唔到每仗必失嘅毛病，好在教練巴斯利召入多件歐洲外流球員，好似馬賽中場杜魯馬，增強班波實力，至少頂得住半場先嘛！
烏克蘭土炮質素高

對手嘅烏克蘭U20對上2次參賽均打入16強先出局，相信今屆至少要殺入淘汰賽先收貨。教練荷洛夫高今次點兵以基輔戴拿模及薩克達球員為骨幹，質素有一定保證。況且佢哋之前喺U19歐國盃打開穩守突擊，相信上半場都係試探居多，留番換邊後先嚟料都未遲。