AC散晒難敵阿特蘭大

猪拉多纳

上周德甲煞科護級區高潮迭起，齋睇從未降班嘅漢堡，嗰日經歷過跌落包尾、上返「安全線」嘅尾四，到最後只排尾三，僅僅取得護級附加賽資格。不過，漢堡仲有一線生機都未識驚，尋日凌晨附加賽首回合喺主場只能逼和卡爾斯魯厄1比1，過程一額汗，能否上岸就要睇埋次回合，不過卡爾斯魯厄呢支乙組踢得有板有眼，當佢哋領先1比0嗰陣勢頭唔錯，漢堡又讓緊半球，大戶亦忍唔住手買咗下盤，最終卡軍守唔住勝果，跣到大戶攤攤腰。

再前一日嘅歐霸盃決賽，烏克蘭奇兵迪尼普面對西維爾毫無懼色，表現突出，喺雙方踢成2比2時，大戶亦玩「走地」入咗少少迪尼普下盤，可惜西維爾始終技高一籌，正所謂人衰行路打倒褪，大戶失手唔係一兩日嘅事，真係黑到冇朋友。唔係賣花讚花香，肥叔上周兩日大題都貼意甲，結果熱拿亞同薩斯索羅順利開出，寧買當頭起，當然食個勢繼續玩意甲喇。重心推介係沒落豪門AC米蘭作客阿特蘭大，「紅黑兵團」高層等候賣盤，主帥恩沙基聽炒，眾將亦意興闌珊等放暑假，仲邊有心機踢好波，已護級成功嘅阿特蘭大，曾賽和拉素、羅馬、拿玻里等勁旅，表現唔曳，平手盤值得一試。

（TVB 302周日凌晨2時45分直播）
大戶動向：肥叔縱橫足球菠菜界多年，先鋒地位誰可代替？更摸清各路大戶投X取向，市場動態盡掌握！