福爾柯克愈戰愈勇爆得

猪拉多纳

蘇格蘭足總盃決賽恩華尼斯對福爾柯克，睇賠率蘇超嘅恩華尼斯好似冇得輸，但佢哋從未喺國內盃賽威過，相反蘇冠福爾柯克愈戰愈勇，撐讓球客勝。

（周六晚10時開賽）

蘇足盃同英足盃好似，都係爆冷溫床，近五屆除咗些路迪叫做攞過兩次盃之外，唔好話盟主，有幾屆決賽分子都係蘇超中下游球隊對碰，甚至蘇冠都有，齋睇實力未必啱晒。
恩華尼斯跌爛盃唔老利

今屆蘇冠奇兵福爾柯克對上一次捧盃已經係1957年嘅蘇足盃，但原來恩華尼斯仲曳，創會以來從未染指過國內兩大盃賽冠軍，去年曾經殺入蘇格蘭聯賽盃決賽，但最終同鴨巴甸120分鐘打和，射輸12碼冇得捧盃。

睇嚟恩華尼斯同隻盃都無乜緣，蘇格蘭足總盃嘅冠軍獎盃於1873年製造，係現存於世上最古老嘅獎盃，蘇格蘭足總早前安排隻獎盃畀兩支決賽分子，等佢哋賽前喺球隊嘅城市巡演，畀當地球迷感受一吓大戰氣氛，點知恩華尼斯喺上個星期一個活動入面，搞到獎盃蓋跌咗落地，上面有個足球員雕像爛咗，足總要嗱嗱聲拎去維修，真係唔老利。

翻查埋對賽成績，兩軍對上5次碰頭，福爾柯克獲4勝1和，其中包括兩次盃賽交手福爾柯克都贏恩華尼斯1比0，心理上因素都贏，今次有得受讓，讓球客勝必捧，小注6.9倍客Ｗ都唔錯！