撐巴塞-2食包捧盃

猪拉多纳

沙維國內最後一戰唔搏點掂

西班牙盃決賽今晚進行王者戰，由今季西甲盟主巴塞隆拿主場迎戰畢爾包，今場係Icon沙維最後一場代表巴塞喺西班牙踢嘅正式比賽，眾星肯定夠晒決心闖過呢場「三冠」次關，「張峰」睇好有前鋒蘇亞雷斯趕及復出嘅巴塞，順利喺90分鐘內擊敗對手捧盃，-2都照撐「讓球主勝」！

（now632台周日凌晨3:30直播）

巴塞嚟到季尾雖然曾經輸畀拜仁同遭拉科逼和，不過兩場波都算係例行公事，粉絲唔使擔心佢哋狀態下滑同出現疲態。最重要係美斯季尾嘅表現超勁，當然身邊嘅尼馬同蘇亞雷斯亦交足功課，蘇亞雷斯今場傷愈復出，「MSN」呢個無堅不摧嘅進攻組合，點會咬唔入畢爾包先？
決賽碰頭例炒3球

呢場決賽喺魯營球場舉行，主場出擊嘅巴塞當然佔盡天時地利人和，更重要係佢哋想幫老將沙維留下美好回憶，爭冠軍決心大過天。依家巴塞實力、決心同狀態都集於一身，睇唔到畢爾包有任何機會爆冷囉！記得09年同12年兩屆決賽，都係由巴塞同畢爾包爭盃，結果巴塞兩次都大勝3球，今戰亦好有機會歷史重演。

畢爾包季尾狀態理想，近7仗錄得4勝3和不敗走勢，今晚決賽肯定會放手一搏力求偷雞。不過呢班波晉級決賽路途一直冇遇過強隊，最難踢都只係切爾達同愛斯賓奴之流。今季聯賽兩鬥巴塞作客先輸0:2，主場更輸夠2:5，今晚對住抖到足嘅「地上最強」，逃得過大敗都要劏雞還神啦！
Data King：巴塞今屆西盃全勝

‧巴塞對上8仗西班牙盃，7次最少攻入3球。

‧巴塞近24仗鬥畢爾包，23次保持不敗。

‧巴塞今屆8場西班牙盃賽事全勝。
乜都玩錦囊：畢爾包征魯營易「大」敗

畢爾包季尾走勢雖然係唔差錄得4勝3和，不過佢哋呢鋪要喺「凶地」魯營球場比賽就點都撐唔過，皆因呢班波近5次作客魯營球場全部輸波收場。事實上佢哋近24次同「地上最強」交手只係贏得1次，擺到明畀巴塞食住，睇怕呢鋪都係凶多吉少，除咗「讓主」之外，博巴塞大屠殺開入球大亦係正路之選。
盤路解碼：巴塞今季20次出戰盃賽贏18場，勝率達9成。