松鼠黃蜂夾計做「細」界

猪拉多纳

日乙 15:00（日）10 大宮松鼠Vs福岡黃蜂

日乙「一哥」大宮松鼠（圖）今日主場迎戰福岡黃蜂，碰正「亞細亞之壁」應該冇咁容易出現大手交易，簡單啲博個1.68倍入球細，好過博大宮讓半一嘅1.84倍上盤，事關隨時執得半個盤，落到袋嘅可能仲少。
松鼠有「日職級」班底

大宮呢隊波除咗開季頭7場波輸過畀櫻花同千葉，最近8場波保持不敗，最恐怖係佢哋今季主場8戰取得6勝2和，係唯一一支日乙主場未輸過嘅球隊，呢班波可以有咁強走勢，原因係擁有一個日職級別嘅班底，好似中場家長昭博、渡邊大剛、前鋒播戶龍二甚至中前場援兵卡連奴斯柏拉巴、美迪查、完全夠料响日職立足，降格踢日乙有乜可能唔屈機吖？

但係佢哋今日遇着福岡黃蜂，都唔會太易踢，事關客隊主帥係前日本國腳井原正巳，後衞出身嘅佢，有個花朵叫「亞細亞之壁」，意思話井原係一道亞洲城牆咁穩固。依家佢教波，一樣繼續用呢種風格，响上個禮拜1:4不敵讚岐之前，福岡就創造咗11戰不敗，對住磐田、櫻花呢啲爭升班大敵，都能夠贏1:0，今季15場日乙賽事仲有7場冇失波，防守非常堅韌，大宮個監督涉谷洋樹都讚對手嘅小組配合同防守好出色。

由於福岡好守得，大宮呢13年嚟主場對住福岡又得4勝3和3負，唔算特別佔上風，加埋今場波轉去NACK個場踢，大宮歷史上响呢度兩對福岡只得1和1負，更加難言乜嘢優勢，兼且中場金澤慎左邊大髀唔多妥，大宮想炒起福岡真係好難。