墨西哥心理質素曳 烏拉圭平手盤有計

猪拉多纳

今日世青盃D組又有好戲上演，由墨西哥U20硬撼烏拉圭U20。成日都話，踢波最忌心浮氣躁，好似墨西哥U20班生牯仔咁，上仗出戰馬里曾一度有踢多個嘅優勢，點知佢哋喺下半場有2件小將極速被逐出場，結果輸波收場，心理質素咁曳仲點捧得落手先？平手盤博1.82倍嘅烏拉圭穩陣啲。

（開賽時間：周三中午12:00）
墨西哥2小將停賽

首戰同馬里上演紅牌風暴嘅墨西哥，馬里守將邁加喺下半場兩黃一紅離場，諗住打多個掂喇啩，點知佢哋嘅守將比拿爾、後備上陣嘅前鋒迪亞高加馬之後喺1分鐘內侵犯對手連環被逐，最終以0:2不敵馬里之餘，今仗仲要坐波監，認真捉蟲。

再講吖，墨西哥一對箭頭馬天尼斯、荷西拉美利斯發揮一樣唔掂，半場就畀教練艾馬格換走。難為呢件教頭賽前仲懶輕鬆咁話仲有2場波可以追，之不過班波家陣1分都冇喎，對住實力差唔多嘅烏拉圭再失分，一啲都唔出奇喎！
烏拉圭3分在手睇定踢

另邊廂嘅烏拉圭就硬淨得多，踢開穩守突擊嘅佢哋上仗鬥塞爾維亞表現sharp醒，喺領先1粒下就算被對手狂攻，依然守得住勝果，何況佢哋揸住3分喺手根本唔急搶攻。仲有呀，教練高爾圖仲留有一手。佢哋嘅維拉利爾前鋒法蘭高阿哥斯達、中場羅美奧古亞拿上仗先做後備，實力有番咁上下，今仗隨時做奇兵都未定喎。

世青盃D組
世青盃賽制

現為分組賽階段，24支球隊分6組踢單循環。每組首2名及4支最佳小組第3名入16強。
好波有得睇（直播以電視台公布為準）

世　青‧墨西哥U20 Vs 烏拉圭U20：周三中午12:00‧CC5

熱身賽‧布里斯班獅吼 Vs 維拉利爾：周三下午5:00‧有線64、203

日聯盃‧名古屋鯨魚 Vs 神戶勝利船：周三晚6:00‧有線61、201