班菲特回師主場得米

猪拉多纳

阿甲聽朝會有3場波踢，當中班菲特主場對沙米恩圖最值得投X。班菲特近期戰績雖然麻麻，最近6仗只係贏過1場，但贏唔到嘅都係啲實力甚強嘅球隊，今仗回師主場面對下游球隊沙米恩圖有力重上勝軌，阿King捧佢哋可以主場奏凱。

（周六早上7時開賽）

班菲特喺3月中曾錄得一波5連勝，更一度攀升到積分榜第5位，但其後狀態轉沉，近6仗只係贏得1場，但球隊贏唔到嘅對手有河床、紐維爾舊生同拉魯斯等實力甚惡嘅球隊，而且始終保持每場都有波入，可見球隊嘅入球能力仍然存在，只係防守表現有所下滑。班菲特今仗雖有中場尼高拉斯杜明高累積滿黃牌停賽，但前線主力如梅里斯奧哥爾路同梅里斯奧阿辛祖近期頻頻有波入，今仗有力攻破沙米恩圖大門。
沙米恩圖近5戰不勝

沙米恩圖現時排喺積分榜第19位，比部分傳統球隊好似葛度爾古斯、基爾梅斯、拉費爾拿同沙蘭迪兵工廠仲要高，表現其實唔錯。不過，沙米恩圖自踏入5月後聯賽4仗都贏唔到，加埋4月尾阿根廷盃輸畀低組別球隊馬尼奧，已經連續5場未贏過，再加上近4仗都「食白果」，球隊入球能力明顯出現問題。沙米恩圖今仗續有中場馬迪亞斯戴亞斯因傷缺陣，後衞柏保安祖斯阿古拿則右小腿有傷上陣成疑，加上作客已連輸兩場，今仗難贏主場出擊嘅班菲特，阿King捧主隊贏波。