戴拿模紅牛和波有路捉

猪拉多纳

聽朝美職將會上演一場獨腳戲，由侯斯頓戴拿模主場恭候紐約紅牛。論往績雖然紅牛係食住戴拿模，之但係紅牛今季作客表現麻麻，加上首席射手巴利胡禮菲臘斯啞火，呢次交鋒好難再佔到甜頭，冷敲3.15倍和局。

（開賽時間：周六早上9:00）

對上3季交手，紅牛對戴拿模的確好少失手，合共錄得7勝3和1負，不過今季紅牛作客表現唔多掂，開季至今6戰僅1勝，好彩，守將卡爾奧美迪、萊爾米拿、卡馬羅倫士雖然被所屬國家隊徵召踢太公波，但可以踢埋呢場先去報到，呢鋪就算攻唔入，相信紅牛都冇咁易失守嘅。

對家戴拿模今仗只得中場巴特戴維斯1件傷兵，射手韋爾布恩呢排腳風又順，近4仗射入4球，斷估班波冇咁易投降。考慮到戴拿模近2次主場出擊都可以逼和紅牛，有路可捉，今次一於跟多鋪和波啦！