斐濟頂得住烏軍

猪拉多纳

「有骨魚腩」圖創歷史

世青盃分組賽嚟到最後一輪，最受矚目肯定係F組嘅斐濟U20惡鬥烏茲別克U20。斐濟呢支「神奇球隊」上仗砌低洪都拉斯令球隊處於出線有利位置，今仗只要贏波就可歷史性喺國際足協所有大賽決賽周嘅分組賽首度晉級。斐濟現時士氣如虹，有力完成歷史創舉，讓球主客和烏茲別克讓二球，阿謙梗係撐受讓嘅斐濟讓球主勝啦！

（周日早上10時開賽）

斐濟首戰大敗畀德國1比8，當大家都以為呢班波係「魚腩」時，佢哋上場就令全世界震驚，清脆3比0「KO」洪都拉斯。斐濟現時兩戰得3分排F組第3，因得失球較差落後排第2同分嘅洪都拉斯。由於洪都拉斯最後一場分組賽對住實力最強嘅德國，斐濟今仗對烏茲別克只要贏波攞3分，就至少可憑最佳第3名晉級，形勢上非常有利。

斐濟今仗更有中場巴克殊傷愈復出，面對分組賽兩連敗嘅烏茲別克絕對有力保不敗，史上首次喺決賽周嘅分組賽晉級，讓球主客和烏茲別克讓二球，當然係捧斐濟讓球主勝。
德國炒起洪都拉斯

同時間同組另一場比賽洪都拉斯U20對德國U20，德國首兩仗入11球展現強大火力，早前延遲歸隊嘅多蒙特前鋒杜斯亞克、1860慕尼黑中場維格爾及後衞麥斯維迪今仗有望正選上陣，就算收起部分主力，仍有力炒起洪都拉斯，讓球主客和德國只係讓一球，阿謙推介讓球客勝。