咬人蘇大飽口福

猪拉多纳

歐聯爭霸鬥獸場3大獵物‧

基亞連尼因傷缺陣今晚歐聯決賽，球迷咪冇得食住花生睇蘇亞雷斯再施咬人絕技囉？唔使驚，「咬人蘇」今場仲有3大「獵物」，分別係同樣試過畀佢出口「傷」過嘅仇家艾拉、充滿煞氣嘅「野獸」泰維斯，同埋擁有強壯臂彎、睇落啖啖肉嘅門將保方，今晚大家一於齊齊坐定定睇吓邊個會中招感染「喪屍病毒」喇！

萬眾期待嘅「歐聯版咬人蘇大戰基亞連尼」最終未能上演，祖記賽前證實基亞連尼喺操練時拉傷腿部肌肉，肯定無緣同仇人蘇亞雷斯再度交鋒。其實基亞連尼係咪因為驚畀「咬人蘇」咬多鑊，所以先稱傷避戰？
艾拉泰維斯保方「惹火」

今場歐聯王者終極戰矚目程度爆晒燈，最鍾意喺大戰「牙痕」發作嘅阿蘇冇咗基亞連尼都冇有怕。阿蘇今季出走英超加盟巴塞隆拿為圓歐聯夢，勢估唔到會喺決賽見番英超最大仇人艾拉，阿蘇効力利物浦期間，曾喺英超鬥曼聯時「出口」種族歧視艾拉，結果引起軒然大波，兩人之後碰面更拒絕握手，火藥味十足。一直否認出口傷人嘅阿蘇今場梗係要同艾拉嚟個了斷，隨時火遮眼忍唔住狂噬對手一啖，各位觀眾今場要落足眼力睇嘞！

除咗艾拉呢個大熱門，仲有兩個潛在「喪屍受害者」：「野獸」泰維斯個樣窮兇極惡，性格火爆，同阿蘇碰頭隨時火星撞地球，鬥咬對方；門神保方外表夠晒型，而且擁有強壯雙臂，「咬人蘇」見到啖啖肉仲唔流晒口水？咁多人可以咬，「咬人蘇」今場遇上「幸福的煩惱」喎！

（歐聯決賽 祖雲達斯VS巴塞隆拿 有線61、64、201、203台 周日凌晨2時45分直播）
兩軍歐洲賽對碰回顧

02/03 歐聯8強

兩回合計祖勝3比2（加時）

兩軍於8強首、次回合均以1比1握手言和需加時作賽，作客嘅祖記憑烏拉圭前鋒薩拉耶達於114分鐘入波淘汰巴塞，可惜打入決賽嘅祖記步巴塞之前兩次後塵，喺決賽功敗垂成不敵AC米蘭
90/91 歐洲盃賽冠軍盃4強

兩回合計巴勝3比2

祖記首回合作客魯營先由卡沙拉基入波，可惜最終反輸1比3，次回合祖記返主場憑巴治奧入波小勝1比0，但兩回合計被巴塞淘汰，巴塞打入決賽不敵曼聯，屈居亞軍
85/86 歐冠（歐聯前身）8強

兩回合計巴勝2比1

巴塞首回合主場先贏1比0，次回合祖記亦先落後，後來憑柏天尼入波追和1比1，但總比數輸1比2衞冕失敗，巴塞之後4強淘汰瑞典哥登堡，可惜決賽以互射12碼不敵羅馬尼亞布加勒斯特星隊