派路最後探戈咪錯過

猪拉多纳

上周有幸為《東方波經》讀者貼中咗條阿仙奴、巴黎聖日耳門、禾夫斯堡嘅盃賽冠軍3串1，喺放暑假前有錢落袋，無謂輸番出嚟喇，始終今晚祖雲達斯對巴塞隆拿嘅歐聯決賽，懸疑、緊張、刺激兼而有之，真係唔睇唔得，但唔買亦可，而且呢場大戰，並非一句金句形容得晒，不妨畀多句：祖雲如要不失就睇保方，如要找條生路便靠派路。
傳球大師 嘆為觀止

點解咁講呢，因為祖雲達斯就係靠老門神保方「保住後方」，其表現比卡斯拿斯更出色之下於準決賽氣走皇馬。由於Peter今季有評述意甲，經常睇到祖記中場派路傳送同妙射罰球嘅造詣，令人嘆為觀止，呢位老將長髮兼滿面鬍鬚，唔使化妝都可扮演耶穌，雖然佢成日愁眉苦臉，但一落場即生龍活虎，今仗可能係呢位傳球大師嘅職業生涯中，喺重要賽事嘅最後探戈，你錯過嘅話就有今生冇來世。

兩虎相爭，總有一隊笑到最後，另一隊則功敗垂成，鍾意進攻嘅球迷，可捧有弗爆三叉戟美斯、蘇亞雷斯同尼馬嘅巴塞，如果想扒冷，當然係捧擅守嘅祖雲達斯，各適其適有何不可呀？祝大家今晚睇一場精彩、神奇、頂級嘅好波喇。
金句：贏咗嘅錢唔係要嚟輸