巴西守細波有墨契

猪拉多纳

美洲盃預演無謂搏傷

美洲國家盃將於12號朝早揭幕，兩支參賽球隊巴西同墨西哥率先今晚交手踢熱身賽。兩隊陣容同樣不整，主隊「森巴兵團」隊長尼馬仲未歸隊，墨西哥領隊米基爾靴里拉棄用查維亞靴南迪斯，大家入波能力難免受削。加上大賽前夕，雙方旨在練兵鬆下筋骨，自然點到即止以免受傷，一於揀入球細。

（周一凌晨4時開賽，馬會網上文字直播）

巴西首席王牌尼馬啱啱為巴塞踢完歐聯決賽，今場唔使預佢，睇番領隊鄧加揀選嘅人腳令人失望，鋒線得番沉寂多時嘅羅賓奴，同効力中超球隊山東魯能泰山嘅迪亞高泰達利，可以話係近年最弱前鋒組合。
尼馬缺陣難炒墨西哥

中場方面，奧斯卡杜斯山度士因傷落選，踢法比較有侵略性得番利物浦中場菲臘比古天奴，同薩克達中場杜格拉斯哥斯達，呢兩位邊緣國腳能否孭起進攻重任，實在令人懷疑。鄧加一向採取穩陣戰術，重掌巴西帥印後8場比賽，有6場保持不失球，其中3場小勝1比0，更何況今場缺少尼馬，而其他中前場球員就欠級數，入波唔荒多。

墨西哥過去發生外流球星紀律欠佳問題，影響成績，主帥米基爾靴里拉決心重用土炮，今次大軍只有4位外流球員，最大名氣已經要數到馬體會前鋒魯爾占美尼斯，及36歲中堅馬基斯。球迷熟悉嘅查維亞靴南迪斯、卡路士韋拿、杜斯山度士都冇份，好難威脅到轉踢穩陣足球嘅巴西。