一哥行運紅鑽摧殘心跳

猪拉多纳

順風順水嘅日職一哥浦和紅鑽，今日晏晝喺聯賽主場迎戰尾二嘅清水心跳。紅鑽啱啱創下日職最佳開季成績，佢哋志切爭奪首階段冠軍，為免夜長夢多，今仗遇弱當然唔會手軟喇，加上有「日版古仔」槙野智章壓陣，不妨直取讓球主勝。

（有線61及201台周日下午3時直播）
「日版古仔」開齋當弗

雖然紅鑽上周中補賽飽食驚風散，直至最後一刻先至作客以3比3逼和柏雷素爾，但換個角度講，咁都執番1分證明有啲運喎，亦令佢哋今季聯賽頭14仗錄得10勝4和未輸過高踞榜首，並打破咗橫濱水手（02年）及名古屋鯨魚（03年）共同保持嘅頭13場不敗紀錄，締造日職史上最佳開局，真係堅過林志堅。查實紅鑽上季亦穩居一哥多時，可惜季尾接連失分，將冠軍拱手相讓畀大阪飛腳，吸取咗咁大教訓後，相信佢哋會打醒十二分精神，拒絕再做悲情球隊。紅鑽今仗有後衞那須大亮刑滿復出，對防守大有幫助，當然唔少得「日版古仔」槙野智章，呢位勁似香港明星古天樂嘅瀛男守將，上仗更攻入聯賽開齋波，狀態唔錯。

另一邊廂，尾二嘅心跳傷兵滿營，防線更係重災區，門將碓井健平、後衞鐮田翔雅、平岡康裕及村松大輔備受傷患困擾，難怪佢哋至今失咗26球，數字同包尾嘅新潟天鵝一樣，點擋得住來勢洶洶嘅紅鑽呀？睇番積分榜，現時打多1場嘅紅鑽領先二弟嘅大阪飛腳7分，首階段剩番3輪，只要飛腳今日輸波，而紅鑽全取3分就可以打多1場下甩開10分，飛腳就算贏晒最尾3場，都阻唔到紅鑽穩奪首階段冠軍，既然剛打破開季紀錄咁旺，讓球主勝有1.97倍咪嫌少呀。