德國女將-4照殺迪

猪拉多纳

加拿大舉行嘅女子世界盃今晚上演B組賽事，兩大歐洲勁旅德國女足及挪威女足分途出擊，面對首次參賽嘅科特迪瓦女足及泰國女足屬大炒格，兩場都捧讓球主勝。

B組四隊包括兩支前度冠軍德國和挪威、以及兩支決賽周新丁科特迪瓦和泰國，基本上爆冷機會甚微，德、挪應可穩奪小組頭兩名出線。德國為現時世界排名第一球隊，贏過03、07年兩屆冠軍，上屆於8強不敵最後冠軍日本衞冕失敗，今屆捲土重來，以囊括近三屆女子歐聯冠軍嘅法蘭克福及禾夫斯堡球員為班底，包括中場瑪洛絲姍、高絲蓮、前鋒美迪姬、後防舒美特及巴杜絲姬，全部都係贏得2013年歐洲國家盃冠軍嘅主力成員，理所當然被捧為奪標大熱門。科特迪瓦以去年非國盃季軍身份取得今屆決賽周入場券，論實力佢哋比起非洲冠、亞軍尼日利亞及喀麥隆已有所不及，陣中除咗外流俄羅斯聯賽嘅前鋒妮希和格哈伊較有卡士，其他成員都係來自本土球隊，初登國際大舞台淨輸經驗都輸死，對住志切爭標嘅德國根本冇得揮，德國讓四球照捧讓球主勝。

（周一凌晨4時開賽）
挪威勢炒泰國洗頹風

同組挪威鬥泰國，95年冠軍挪威已經多年未喺世盃再威過，上屆更加歷史性首次於分組賽出局，今屆佢哋以兩年前歐國盃亞軍陣容出戰誓要重振雄風。泰國於亞洲排名第六，實力、經驗俱未夠班，挪威讓四球捧讓球主勝。