瑞士強鋒唔赦日本

猪拉多纳

「德國力量」護身

女子世盃C組輪到衞冕嘅盟主出場，由日本女足對瑞士女足，2.5倍嘅「讓球客勝」值得一試。雖然日本女足係上屆冠軍，弊在佢哋喺熱身賽嘅表現，明顯唔多上力，何況對家嘅瑞士女足有「德國力量」護身，仲有首席射手迪克雯入波頻頻，有權搶分喎！

（中央5台周二早上10:00直播）
澤穗希第200次為日本上陣

4年前奪得冠軍嘅日本女足，其實6場比賽得2場贏多過1球，仲試過輸畀英格蘭女足，睇番佢哋熱身賽嘅戰績，近2場都係只贏1粒僅僅熟，論實力絕對唔算超班，何況第6次出席女子世盃嘅中場靈魂澤穗希已經36歲，就算教頭佐佐木則夫話會畀佢打正選，等佢可以第200次代表國家隊上陣，似乎要贏波都係有啲難度。
瑞士11個球員喺德國搵食

雖然日本女足有4個成員喺德國落班，包括曾經被稱為天才少女嘅拜仁慕尼黑女足前鋒岩渕真奈，不過佢右膝傷初愈，而且瑞士女足仲犀利，首先教頭迪克倫寶喺球員時代為德國女足贏過唔少錦標。仲有呀，佢哋有11件戰將喺德國搵食，加埋里昂女足射手迪克雯喺外圍賽攻入11球，火力咁猛，爆得出唔奇喎！