中國女足食橙出口氣

猪拉多纳

女子世界盃A組，中國女足第2度出擊對「橙軍」荷蘭女足。中國姑娘首仗補時被判罰12碼，搞到輸畀主辦國加拿大女足，真係慘豬，但亦因為輸得唔抵，相信會更加激發球員今仗爭勝決心。對手荷蘭女足首度打入決賽周，實力麻麻，正係中國女足搶分好時機，撐「中女」打開勝利之門，要主W。

（周五早上6時開賽）

其實中國女足上仗表現唔錯，但無奈對手係東道主，除咗地利，仲有「人和」，唔多唔少獲得球證偏袒，所吹罰嘅12碼亦有爭議，連加拿大傳媒都話，要多謝球證幫手。呢啖冤屈氣應會成為「中女」爭勝動力，尤其係如果今場再失分，出線就有好大危機，背水一戰更加搏命。
德挪女足「大」駁火

荷蘭女足上仗小勝新西蘭女足1比0，但優勢並唔明顯，射門次數只及對手一半，加上已有3分在手，今仗唔輸已有着數，或會踢守勢波，有利中國女足控制戰局。

B組兩支傳統勁旅交鋒，德國女足對挪威女足，德女上仗狂炒科特迪瓦10球，攻力非常得人驚。不過挪女話晒近4屆有兩次入4強，絕非泛泛之輩，就算輸波亦有力破蛋，最好捧入球大。