西班牙 哥斯達黎加 門將鬥法做細界

猪拉多纳

皇馬門神大戰即將上演！卡斯拿斯一直係「銀河艦隊」嘅正選門將，不過佢近年表現滑落，唔少球迷青睞曼聯門將迪基亞接班，結果令後備門將基羅拿華斯繼續被視若無睹。適逢哥斯達黎加聽朝作客西班牙拍跳，拿華斯梗係想證明自己都有料做皇馬冧巴溫，唔會畀一眾狂牛鋒將入波咁失威啦！2.25倍入球細值博。

（now633台周五凌晨4:00直播）
卡斯拿斯 迪基亞

爭做「狂牛」首席門將

迪基亞上艦消息愈傳愈盛，兩代西班牙門將競爭轉趨白熱化，仲似乎不和添。事關有記者早前影到，佢哋喺練波場地嘅停車場撞到，互當透明連招呼都費事打。仲有呀，據講領隊迪保斯基未定實首席門將誰屬，換言之邊個落場都肯定會打醒12分精神把關避免出錯，睇怕哥斯達黎加想有波入都難。
拿華斯要搶皇馬正選

至於長坐皇馬冷板嘅門將基羅拿華斯唔係冇人吼，英國《星期日人民報》透露利物浦諗住用1,050萬鎊（約1.2億港元）帶佢逃出生天。不過呢位28歲門將早前喺西班牙電視台《La Sexta》表明唔會做懦夫：「我唔介意同卡斯拿斯、甚至迪基亞鍊過，我願意為皇馬正選位置奮鬥至死！」難得呢鋪可以直接挑機，拿華斯仲點會衰畀對方睇先？

況且對「狂牛軍團」嚟講，始終4日後作客歐國盃外圍賽C組對手白俄羅斯場波先至係最重要，加上中場恩尼斯達因傷退隊，今仗話唔定寓賽於操，未必搏盡數胡，何況哥斯達黎加殘陣出擊，入球細抵玩喎。