半力墨國-1照贏玻

猪拉多纳

美洲國家盃聽朝上演A組另一場首輪賽事，由墨西哥迎戰弱旅玻利維亞。墨西哥雖然冇揀包括「小豌豆」查維亞靴南迪斯在內嘅多名外流球星，可謂半力出擊，但玻利維亞冇咗高原主場庇佑之下就唔識踢波，呢碟冇骨魚腩送到上門，「墨佬」梗係唔客氣大擦一餐喇，讓球主勝咪錯過。

（now 681周六早上7時30分直播）

當大家見到墨西哥出戰美洲盃嘅大軍名單，都會認為佢哋冇心爭冠，因為最出名嘅「小豌豆」查維亞靴南迪斯、卡路士韋拿、古亞達度、杜斯山度士兄弟及「墨國Sam哥」奧祖亞等外流球星，統統冇份，喺歐洲搵食嘅只得魯爾占美尼斯、查維亞阿基路同捷西斯哥朗拿三個奀星，其他都係喺國內搵食，睇落真係好削喎。
玻利維亞離開高原就腳軟

由於墨西哥堅重視下月舉行嘅美洲金盃，因此主帥米基爾靴里拉決定兵分兩路，美洲國家盃派更多年後生兼冇乜經驗嘅二打六參賽，上述嗰班主力就出戰美洲金盃。儘管「墨佬」擺明Hea踢美洲盃，不過「狂人」米基爾靴里拉講明會畀驚喜大家，唔知係咪講緊艾斯基達，呢個27歲嘅國家隊邊緣人，今季克服傷愈困擾，外借到堤格雷斯喺自由盃上陣5場入4粒，協助堤軍殺入4強，梗係趁住「小豌豆」等主力缺陣博上位喇。

玻利維亞最叻係靠高原主場恰對手，當失去地利之助例必腳軟，呢個習慣未有改善，就算今次去到智利訂咗豪華酒店住得舒適，都唔使旨意佢哋會有佳作，日前熱身賽先慘吞阿根廷5蛋有辦你睇。而且玻軍今次係以國內搵食球員為主，踢緊AC米蘭嘅施巴斯坦甘馬拉聽都未聽過，最出名係効力中超FC長春嘅前鋒馬些路摩連奴，睇見都買唔落手！墨西哥半力出擊亦夠殺有餘，不妨直取「墨佬」讓球主勝。