美國女足開火大反擊

猪拉多纳

瑞典領隊倒戈炮轟前主將

球壇上未必可以做到再見亦是朋友，就算兩者之前有幾合拍都係咁話。好似現任瑞典主帥皮婭曾帶領美國女足贏得08、12年奧運金牌，家陣分手後各為其主，就即刻大講美國3線主將壞話，呢啖氣你叫嗰班美國女將點啃得落先？聽朝美國喺女子世盃D組火併瑞典，梗係要追1.52倍入球大啦！

（開賽時間：周六上午8:00）
寸3花旗女將麻煩年紀大

瑞典女足領隊皮婭賽前唔知食錯咩藥，接受美國《紐約時報》訪問嗰陣失驚無神炮轟班美國女足。包括喪插中場萊德、門將蘇露兩個係麻煩友，成日挑戰自己嘅領隊權威。再嚟又睇死老牌前鋒雲芭芝高峰已過，揚言自己仲教緊美國嘅話，肯定唔會再畀佢踢正選。皮婭賽前處處辣火頭，一眾花旗英雌仲唔落場搏殺還以顏色咩？
美國雲芭芝誓入波騷哥利

話晒皮婭之前執教美國女足多年，佢實搵到對方弱點攻破花旗國大門。之但係瑞典首戰喺領先2球下，最終被尼日利亞逼和3:3，反映班波攻強守弱。皮婭掛住開火都唔花精神執好後防，仲邊旨意佢哋可以保住清白身。況且美國女足史上最佳射手雲芭芝咁畀皮婭踩上心口法，今仗實行同瑞典後防搏命都似，加埋美國王牌前鋒雅歷絲摩根養傷2個月後經已康復，美國女足呢鋪有齊足夠本錢開火做大騷喇。