烏拉圭埋牙即起筷

猪拉多纳

雖然烏拉圭喺今屆美洲國家盃係以衞冕身份出戰，但佢哋冇咗「哨牙蘇」蘇亞雷斯，畀外界一致睇死會變做「冇牙圭」，喺足智彩奪冠賠率只得14倍，冷過晒阿根廷、巴西、智利同哥倫比亞。之不過咁，烏拉圭今場喺B組首戰對住美洲盃新丁、實力差成九條街嘅牙買加，唔會咁都贏唔到卦？科娜一於捧1.73倍嘅讓球主勝！

（now 681周日凌晨3時直播）
阿蘇停賽 洛蘭等上位

牙買加係加勒比海地區嘅一個島國，今屆首次獲邀參加美洲盃，對住同組嘅阿根廷、烏拉圭同巴拉圭三支強敵，梗係要交學費喇！牙買加擁有守將韋斯摩根及馬里亞柏等多名喺英格蘭搵食球員，不過都係一啲二線兵，嚟到美洲盃呢啲大場合，首次落場唔緊張就假！

烏拉圭今次冇咗因咬人而被罰停賽嘅蘇亞雷斯，老將科蘭亦已退出國家隊，三叉戟依家剩番卡雲尼一個，所有人嘅注意力都喺晒佢到，反而畀咗個上位好機會畀小將迪亞高洛蘭，呢位22歲法甲波爾多前鋒獲得「哨牙蘇」留低嘅9號波衫，可見主帥泰巴尼斯非常睇起佢。烏拉圭備戰今次美洲盃只係安排咗一場熱身賽，喺上周大炒危地馬拉5比1，拍住卡雲尼做正選箭頭嘅洛蘭，仲開波3分鐘就閃電建功添，科娜睇好呢個後生仔今場會有好表現喎！